Ísfirðingar blása til Reykjaneshittings næstu helgi, þ.e. 9.-12. september. Hittingurinn hefst á fimmtudagskvöld og stendur fram á sunnudagskvöld.

Þessa frétt má lesa á svonefndri "Facebook"- síðu Sæfara.

"Sæfari hefur staðið fyrir vor og haust hitting í nokkur ár og eins og þeir vita sem hafa mætt er þetta samkoma misvanra kayakræðara sem skemmta sér og öðrum og kenna eða læra.

Reykjaneshittingur eru helgarsamkomur áhugafólks um kayakróður. Þar gefst vönum sem óvönum tækifæri til að spreyta sig, læra og miðla af þekkingu sinni í ótrúlega fallegri náttúru, fyrirmyndaraðstöðu og félagsskap skemmtilegs fólks. Falleg náttúran býður upp á róður innan um seli, lunda, óborganlegt fugla- og sjávarlíf auk þess sem rebbi er stundum sjáanlegur. Sundlaugin á Reykjanesi er stærsti "heiti potturinn" á landinu og kjörinn til æfinga á kayak. Gisting og aðstaða er til fyrirmyndar og ekki spillir verðið fyrir.

Kveðja Sæfari.

Byrjað er að blása til ferðarinnar á korknum. Sjálfsagt að varpa fram spurningum þar, ef einhverjar eru.

Úrslit í Hvammsvíkurmaraþoni 4. september 2010 voru sem hér segir.

1. sæti - Rúnar Pálmason á Valley Nordkapp
1. stopp: 1:38.30   2. stopp: 3:29.30   Mark: 5:39.18

2. sæti - Örlygur Steinn Sigurjónsson á Lettman Godthap
1. stopp: 2:06.50   2. stopp: 4:23.05   Mark: 6:45.20

Féll úr keppni - Sigurður Pétur Hilmarsson á Kirton Inuk
1. stopp: 1:49.05   2. stopp: 3:36.50

Töluverður strengur var úr SA við rásmark. Veðurstöð á Geldinganesi mældi 14 m/s jafnaðarvind kl. 12:00 og að mesta hviða hafi slegið upp í 19 m/s. Svo virðist sem vindurinn hefur rifið sig upp einmitt þegar við vorum að leggja af stað því veðurmælingar fyrir hádegi og eftir sýna minni vindstyrk. Á Kjalarnesi mældist 14 m/s jafnaðarvindur en 20 m/s í hviðum í hádeginu. Róðurinn var því verulega krefjandi. Í Hvalfirðinum mætti ræðurum austanstrengur, á bilinu 12-14 m/s og sterkari í hviðum.

Þess má geta að Pétur Hilmarsson fagnaði fimmtugsafmæli sínu með þátttöku í Hvammsvíkurmaraþoni. Víst er að hann gleymir ekki þeim afmælisdegi í bráð!

Mótsstjóri var að venju Pétur B. Gíslason. Sævar Helgason og Þóra Atladóttir buðu sig fram sem starfsmenn keppninnar. Þeim er þakkað kærlega fyrir keppnina. Sömuleiðis skal minnt á að öryggisgæsla var í höndum Björgunarsveitarinnar Kjalar á Kjalarnesi. Slík gæsla er forsenda fyrir keppnishaldi.

Stefnt er að því að ræsa keppendur í Hvammsvíkurmaraþoni kl. 10 eins og áður hefur verið auglýst. Nánar á korkinum.

Veðurspá er tvísýn á Kjalarnesinu og gæti frestað Hvammsvíkurmaraþoni.  Fylgst verður með þróun næstu klukkutímana og lokaákvörðun birt á korkinum í síðasta lagi kl. 8 í fyrramálið.  Ef af frestun verður keppt kl. 10 á sunnudagsmorgun.

Búið er að kaupa heilt lamb í kjötsúpuna og ná  í útdráttarverðlaun frá 66°N (áttu að vera í boði í Reykjavíkurbikar en þær gleymdust þá), kaupa gos og samlokur. Einnig fá keppendur neyðarblys. Leitun er að annarri keppni þar sem svo vel er hugsað um keppendur. Minnt er á að keppnisnefnd gleymdi alveg að auglýsa keppnisgjald og því er þátttaka ókeypis að þessu sinni.

Ródeóið verður haldið á sama stað og sama tíma og áður hefur verið auglýst. Keppendur þar fá líka samlokur og gos.

Væntanlega hafa allar kayakkonur og -menn tekið laugardaginn 4. september frá því þá stendur mikið til hjá Kayakklúbbnum. Bæði verður keppt í Hvammsvíkurmaraþoni og í Haustródeói og þá ráðast úrslitin í æsispennandi keppni um Íslandsmeistaratitla.

Hvammvíkurmaraþonið er vissulega krefjandi enda er það sannkallað maraþon, 42,2 km (eða þar um bil). Þeir sem ekki vilja róa svo langt geta tekið þátt í liðakeppninni en þá skipta þrír keppendur með sér vegalengdinni. Karlar og konur geta skipað sama liðið. Þeir sem ekki finna sér liðsfélaga geta vafalaust fundið sér félaga á mótsdag. Boðið var upp á liðakeppni í fyrsta skipti í fyrra og reyndist það afar vel. Í lok keppni er boðið upp á kjötsúpu og keppendur fá hressingu í tveimur skyldustoppum sem eru á leiðinni. Ræst er í maraþoni kl. 10 en keppendur þurfa að mæta a.m.k. 30 mínútum fyrr. Róið er milli Geldinganess og Hvammvíkur í Hvalfirði. Rásmark er valið með tilliti til veðurs.

Haustródeóið verður haldið í Tungufljóti. Mæting er fyrir ofan brúna á fljótinu, rétt norðan við Geysi í Haukadal klukkan 12 og keppni hefst klukkan 13.00. Mikil tilþrif voru sýnd í Elliðaárródeói í vor og nú er að sjá hvort keppendur hafi bætt sig eitthvað í sumar eða hvort þeir séu kannski orðnir stirðir eftir allar grillsteikur sumarfrísins. Á bakkanum verður boðið upp á hressingu fyrir örþreytta íþróttagarpa. Hugsanlega einnig axlanudd.

Lokahófið verður haldið síðar í haust. Þar verða Íslandsmeistarar krýndir, grobbsögur sagðar og ódauðlegar kayakmyndir sýndar. Dagskrá nánar auglýst síðar.