Sjókayakklúbbferð í Straumfjörð á Mýrum helgina 4-6 júlí 2004. Kayakklúbburinn efndi til sinnar árlegu helgarferðar í júlíbyrjun, ferðar sem einkum er ætluð byrjendum til að kynnast sjókayaksportinu á skemmtilegu kayakróðrarsvæði með þeim sem vanari eru og hafa öðlast reynslu í ferðamennsku á sjókayak.
Kayakklúbburinn efndi til sinnar árlegu helgarferðar í júlíbyrjun ,ferðar sem einkum er ætluð byrjendum til að kynnast sjókayaksportinu á skemmtilegu kayakróðrarsvæði með þeim sem vanari eru og hafa öðlast reynslu í ferðamennsku á sjókayak.
Ferðanefndin hafði undirbúið og skipulagt ferðina og sett ferðaáætlunina á heimasíðu Kayaklúbbsins ásamt því sem góðar umræður fóru fram á “korknum”,kayakfólksins sín á milli. Straumfjarðarsvæðið er afar viðkvæmt á varptíma þeirra fugla sem þarna eiga sín hreiður og alveg sérstaklega æðarfuglsins. Það er því mjög mikilvægt að kayakróðrarferðir um þetta svæði séu með leyfi og í sátt við landeigendur. Reynir Tómas í ferðanefnd, hafði allan veg og vanda af þeim þætti og var hann jafnframt tengiliður ferðarinnar.
Alls mættu 20 sjókayakræðarar til róðra ,flestir strax á föstudagskvöld, og var búið við góðar tjaldaðstæður í Straumfirði. Aðalróður helgarinnar var á laugardeginum og er róðrarleiðin sýnd hér á meðfylgjandi korti. Róðrarleiðin var um 20 km.
Verulegur hæðarmunur er á milli flóðs og fjöru á þessu svæði eða um 4 metrar. Róðrarleiðin á útleið var fjær landinu , eins og sést á kortinu, vegna útfallsins og síðan sýnist hún sumstaðar liggja yfir land , en það fór á kaf á flóðinu, sem var á heimleið. Milt og gott veður var meginn hluta ferðarinnar, en súld og stundum smárigning, en á heimleið gerði VNV 8-10 m/sek vindstreng af hafi og á móti.
Allir sjókayakræðararnir stóðust róðurinn með mikilli prýði . Góður og skemmtilegur hópur og á breiðu aldursskeiði.
Um átta kayakræðarahópur réri síðan á sunnudeginum, sunnan varpeyja og í Hjörsey auk þess sem tveir réru á föstudagskvöld út í Þormóðssker og til baka aftur og sumir réru
Borgarfjörðinn þveran og í Straumfjörðinn seint að kvöldi föstudags. Myndefni og frásagnir þeirrra ferða eru ekki inni í þessari umfjöllun.
Straumfjörður á Mýrum
Á myndinni sést straumröstin í fjarðarmynninu , sem Straumfjörður dregur nafn sitt af. Verulegur straumur er þarna í fjarðarmynninu , einkum á útfallinu. Straumfjörður á Mýrum var um aldir verslunarstaður sveitanna á innanverðu Snæfellsnesi ,Mýra og Borgarfjarðar með ýmsum “ handhöfum verslunarleyfa”, m.a dönsku einokunarverslunarinnar góðkunnu , en verslun lagðist með öllu af þarna um aldamótin 1900 og fluttist þá í Borgarnes. Þar höndla menn enn í dag. Verslunarhúsin voru aðallega á nesinu sem myndin er tekin frá og eru enn sjáanlegar vegghleðslur þeirra , allt frá tímum Hansakaupmanna.
Á nútíma er Straumfjörður þekktur fyrir sjóslysið mikla sem varð í september árið 1936, þegar franska rannsóknarskipið Pourquoi Pas ? strandaði á skerinu Hnokka , í ofsaveðri. 39 menn fórust, en einn komst lífs af. Hnokki er rúma 3 km sunnan Straumfjarðar. Handan fjarðar er Kóranes, en fyrir það lá róðrarleið okkar.
Miðnætursól í Straumfirði á föstudagskvöld
Tjaldsvæðið í Straumfirði
Byrjað er að gera klárt fyrir laugardagsróðurinn . Lagt var af stað um kl 11.00
Lagt af stað frá Straumfirði
Gummi gerir sjóklárt—GPS staðsetning sett inn. Rúmlega er hálf útfallið. Falleg og góð skeljasandsfjara er í Straumfirði
Róðurinn frá Straumfirði er hafinn
Í baksýn er Sandey. 20 kayakræðarar leggja í róðurinn. Stillt er í sjóinn . Róið var þvert fyrir mynni Straumfjarðar, en þar sem farið var að nálgast liggjandann var straumröstin hæg og ljúf, en á heimleiðinni í VNV strengnum og á aðfallinu þurftu þeir sem næst landinu réru að taka verulega á yfir straumröstina.
Við Tangey
Við Tangey sunnan Álftaness á Mýrum
Lending í fjörunni sunnan við Litlabæ á Álftanesi
Víðáttumiklar fjörur eru þarna á Álftanesinu og mjúkur skeljasandur . Hópurinn hefur tekið land og stefnt er á kaffipásu og spjall.
Lending sunnan Litlabæjar á Álftanesi
Aðfallið er að byrja og betra að draga kayakana vel upp á sandinn , því hallinn er lítill og sjórinn því fljótur að flæða yfir stórt svæði
Kaffipása og fróðleikur í melgresinu á Álftanesfjörum
Leiðangursstjórinn Reynir Tómas flytur hugvekju um hvernig skemmtilegur kayakróður sem þessi verður til innan félagastarfs Kayakklúbbsins— kayakfólkið hlustar með andakt og verður um margt fróðara . Þarna var gott að stoppa endurnýja kraftana áður en við héldum inn að mynni Borgarfjarðar, sem var næsti áfangi.
Róið á lygnum sjónum innan við Girðisflögur í mynni Borgarfjarðar
Róið með Girðisflögum í mynni Borgarfjarðar
Eyjar og sker taka sífelldum breytingum fyrir áhrif flóðs og fjöru og mikið sjónspil að upplifa. Sjókayakróður er engum öðrum sjóferðamáta líkur— friðsæll og frjáls þegar vel viðrar.
Í Álftanesós
Ein hugljómun ferðaplansins var að róa inn Álftanesósinn og síðan með vaxandi flóði alveg inn í Straumfjörð. Í umræðunni á “ Korkinum” fyrir ferðina var velt upp tímasetningum varðandi flóð og fjöru. Hvaða máli skiptir það ?? sögðu róðrarfélagar . Svarið fékkst hér í Álftanesós . Við vorum ekki á réttum stað á réttum tíma og hér dregur Reynir Tómas í land og ákveðið er að meta stöðuna. Það vantaði sjóinn í þessar flæður. Eins og einu sinni var sagt “Kóngur vill sigla , en byr ræður” En þetta var mjög gaman og eftirminnanlegt og í raun “rúsínan í pylsuendanum” á róðrinum.
Í Álftanesósnum
Hér er fyrsta strand í ósnum . Í baksýn er kirkjan í Álftanesi á Mýrum.
Hér höfum við smásaman þokast um 1 km upp í Álftanesflæðurnar eftir því sem aðfallið vex.
Þegar hér er komið er orðið sýnt að lengra verður ekki komist fyrr en eftir einhverja klukkutíma. Það vatnar tæpast yfir tærnar á Jóa þegar hann stígur úr kayaknum. Ákveðið var að snúa við og hætta þar með við að róa inní Straumfjörð þessa leið. Á útleiðinni, fremst í ósnum, var kominn bullandi ólgustraumur á innleið og var skemmtilegt að þvælast yfir þá ólgu. Þegar út á haf var komið var hafgolan að vinda sig uppí strekkings mótvind sem hélt okkur vel við róðurinn allt inní Straumfjörð.
Þessum skemmtilega laugardagsróðri lauk síðan við tjaldstæðið í Straumfirði milli kl. 17 og 18 þann 5. júlí 2004 eftir 20 km sjókayakróður frá Straumfirði með suðurströnd og eyjum Álftaness á Mýrum ,inn í mynni Borgarfjarðar og með ýmsum krókaleiðum til baka.
Ástæða er til að hvetja kayakræðara ,einkum hina óreyndari, til þáttöku í ferðum sem þessari og öðlast nauðsynlega reynslu með því móti.
Texti: Sævar Helgason
Myndir {picasa} : Guðmundur Jón Björgvinsson og Sævar Helgason