Um kvöldmat í gær (mvd. 9.7.) var ég að sækja bátinn minn og varð starsýnt á mikið fuglalíf í fjörunni vestan í Eiðinu en vel var fallið út. Þarna var mest um kríu en einnig sílamáf á að giska 800 kríur og 200 máfa . Það gekk mikið á, garg og "snertilendingar" og oftast með eitthvað í kjaftinum á uppleið.
Ég sá ekkert í fyrstu, ekki heldur í fjöruborðinu en leit svo við og sá síli detta úr fuglsgoggum og þegar betur var gáð var hreyfing í sandinum. Ég strauk fætinum eftir sandinum og undir yfirborðinu reyndust vera síli út um allt. Þau voru sprelllifandi og stukku úr lófa mér ef ég hélt ekki hönd yfir, um 7-10 cm löng gljándi silfruð og svört, grönn eins og drykkjarrör á bolinn. Eftir fiskabók gætu þetta verið sand- eða trönusíli en ekki þó nema hálfvaxin.
Það er ánægjulegt að verða vitni að svo iðandi lífi og hef ég aldrei séð þetta fyrr á þeim 10 árum sem ég hef lagt leið mína um Eiðið við Geldinganes.
