Við stefnum á að gera þetta svipað og í fyrra.
Hittumst við Laugardalslaugina á milli kl. 9 og 10 til að græja báta fyrir þá sem þurfa að fá lánað. Brottför frá Laugardalslaug kl.10:00. Þeir sem ætla að koma sjálfir á Drumboddsstaði þurfa að vera komnir þangað kl 11:00.
Hægt er að fá lánaða báta hjá klúbbnum en ekki galla. Ef fólk þarf galla, þá er hægt að leigja þá á Drumbó fyrir sanngjarna upphæð. Stefnan er að skipta liðinu þannig að hver vanur ræðari sé með tvo til fjóra óvana undir sínum verndarvæng.
Rennslið í Hvítánni undanfarna daga hefur verið 220-270 rúmmetrar á sekúndu. Venjulegt sumar-rennsli er í kringum 100. Líklegast mun hún haldast í hærri kantinum eitthvað áfram. Nýliðaferðin hefst í Brúarhlöðum og endar þar sem raftferðirnar enda.

Skráið mætingu á krokinn eða email til : joimeistari@gmail.com

Vorhátíðin og Reykjavíkurbikarinn gengu sérlega vel fyrir sig. Veðurspáin var tvísýn dagana fyrir keppni og var spáð allmiklum vindi. Það rættist hins vegar úr veðri og kjöraðstæður voru fyrir keppni. Sumir keppendur höfðu þó á orði að vindur og sjólag hefði mátt vera meira krefjandi til að bæta stöðu báta með góða sjóhæfni en eru hlutfallslega hægari í mildu sjólagi.

Alls voru 19 ræðarar sem tóku þátt í keppninni að þessu sinni. Róið var réttsælis umhverfis Geldinganesið og þaðan róinn hringur umhverfis bauju í Blikastaðakrónni (hólmi var ekki hringaður)

Það voru 15 ræðarar sem tóku þátt í 10 km róðri karla. Að þessu sinni kepptu allir í flokki ferðabáta (enginn keppnisbátur). Sigurvegari varð Ólafur Einarsson og næstir komu Sveinn Axel og Eymundur. Grænlensku árarnar sem hafa mikið verið notaðar á undanförnum vikum voru hvíldar og fimm efstu menn notuðu vængárar.