Út er komin bókin Á sjókeip kringum landið, ferðasaga Gísla H Friðgeirssonar um róðurinn umhverfis Ísland sumarið 2009. Hann varð fyrstur Íslendinga til að ljúka því verkefni en Guðni Páll reri síðan hringinn í sumar eins og kunnugt er.

Bókin er komin í bókaverslanir Eymundsson. Hún er um 300 bls. með fjölda svarthvítra mynda, orðskýringum og örnefnaskrá. Verð frá Gísla er kr. 4000 og klúbbfélagar geta snúið sér beint til hans, álagning bætist síðan við verðið í bókaverslunum.

Ferðasagan er frásögn um krefjandi langferð á kajak og veitir kynni af ströndum landsins. Í slíkri ferð þarf að þekkja eigin takmörk og takast á við kvíða, þreytu og annað sem allir þekkja. Þannig á bókin erindi við víðan hóp lesenda.

Netfang vegna bókarinnar er iskeipur@simnet.is

Síðastliðinn laugardag 24. ágúst fór fram hálfmaraþon Kayakklúbbsins en ákveðið var að hafa hálfmaraþon í ár í stað Hvammsvíkurmaraþonsins. Róið var frá Nauthólsvík til Geldinganes og var vegalengdin rúmlega 22 km með einu skyldustoppi við Gróttu (5 mín). Aðstæður voru ágætar, en þó blés aðeins á leggnum Nauthólsvík-Grótta.

11 ræðarar mættu til leiks og luku 10 keppni. Ólafur B Einarsson sigraði í keppnisbátaflokki karla (02.15:05 á Dominator XL), Eymundur Ingimundarson í ferðabátaflokki karla (02:16:07 á Kirton Inuk) og Þóra Atladóttir í ferðabátaflokki kvenna (02:37:27 á Rockpool Taran).

Keppnisnefnd þakkar þeim sem aðstoðuðu við keppnina en án öflugrar öryggisgæslu og annarrar aðstoðar færi keppnin ekki fram. Meðal þeirra sem aðstoðuðu við framkvæmdina voru Bjarni, Sævar, Gísli, Maggi, Marta, Hildur og Guðrún. Auk þeirra voru Guðni Páll og Eva á fylgdarbát (sem GG sjósport lagði til) svo og fylgdi björgunarbátur frá Björgunarsveitinni Ársæli keppendum. Bátafylgdin var sértaklega mikilvæg í ljósi þessa að keppendur þurftu að þvera siglingarleiðir.